Góður árangur austfirsk frjálsíþróttafólks
Austfirsk frjálsíþróttafólk hefur staðið í ströngu að undanförnu enda innanhúss keppnistímabilið í fullum gangi. Nýyfirstaðin eru Stórmót ÍR og Meistaramót FRÍ 15-22 ára, árangur okkar fólks þar hefur vakið verðskuldaða athygli. Keppendur UÍA skipuðu sér þar í fremstu röð og mokuðu inn verðlaunum, þrátt fyrir að aðstaða til innanhúsæfinga hér eystra komist ekki í hálfkvisti við þær aðstæður sem flestir helstu keppinautar þeirra æfa við.
Á Stórmóti ÍR sem fram fór fram 11.-12. febrúar í Laugardalshöll, þar sigraði Daði Þór Jóhannsson í hástökki pilta 16-17 ára en Daði sem er með lágvaxnari hástökkvurum landsins stökk hæð sína í loftið og fór yfir 1,69 cm, hann nældi einnig í silfur í þrístökki.
Mikael Máni Freysson gerði það líka gott á Stórmótinu og sigraði í þrístökki pilta 18-19 ára. Steingrímur Örn Þorsteinsson keppti einnig og náði góðum bætingum í 60 m og 200 m hlaupum.
Piltarnir héldu svo ótrauðir áfram sigurgöngu sinni skömmu síðar á Meistaramóti FRÍ 15-22 ára sem fram fór í Laugardalshöll um síðustu helgi. Þar landaði Mikael Máni Íslandsmeistaratitli í þrístökki í flokki 18-19 ára, tók silfur í langstökki og brons í hástökki. Daði nældi í brons í þrístökki. Ferðin á Meistaramótið var öll hin ævintýralegasta en ófærð hafði mikil áhrif á framgang ferðalagsins og var keppni í hástökki pilta 18-19 ára til að mynda langt komin þegar Mikael Máni komst loks til leiks.
Austurfrétt hefur gert afrekum þeirra félaga góð skil og hér má lesa um árangur þeirra á Stórmóti ÍR og hér um ævintýri þeirra á Meistaramóti FRÍ.
Drengirnir æfa báðir með frjálsíþróttadeild Hattar undir stjórn Lovísu Hreinsdóttur, en hún var að vonum stolt af sínum mönnum. ,,Það er í raun frábært að fylgjast með þeim og magnað að sjá að þeir standa jafnvígir keppendum úr mun stærri félögum. Árangur þeirra einkum í þrístökki vekur mikla eftirtekt annara þjálfara og keppenda, því við höfum enga innanhús gryfju til æfinga hér eystra, á meðan félagar þeirra syðra geta æft við kjöraðstæður allan veturinn."
Mikael Máni Freysson UMF Þristi og Daði Þór Jóhannsson Leikni á góðri stundu, myndina tók Lovísa Hreinsdóttir
