Boltafélag Norðfjarðar hampaði Launaflsbikarnum
Boltafélag Norðfjarðar (BN) er sigurvegari bikarkeppni UÍA og Launafls í knattspyrnu árið 2018. BN náði bikarnum eftir að hafa unnið Ungmennafélag Borgarfjarðar (UMFB) eftir vítaspyrnukeppni. Leikið var til úrslita á Fellavelli í gærkvöldi.
Borgfirðingar byrjuðu betur og það var Bjarki Berndsen sem skoraði fyrsta mark leiksins á 15. mínútu með skoti vinstra megin úr teignum. Borgfirðingar urðu reyndar fyrir áfalli snemma leiks þegar þeirra markahæsti maður, Sveinn Hugi Jökulsson, snéri sig og gat ekki leikið meir.
Norðfirðingar jöfnuðu á 39. mínútu eftir að vörn UMFB hafði opnast. Borgfirðingar komust hins vegar yfir fyrir hálfleik, í uppbótartíma fylgdi Birgir Ottesen eftir skoti sem hrökk út í teiginn af þverslánni með bakfallsspyrnu.
Fátt var um færi í seinni hálfleik en eftir sem á leið gerði BN sig líklegra. Það bar árangur, William Geir Þorsteinsson kom boltanum framhjá markverði UMFB eftir langa sendingu á 84. mínútu. Þeir skullu reyndar saman og haltraði William af velli í kjölfarið.
BN sóttu síðustu fimm mínúturnar og fékk skotfæri en skoraði ekki. Staðan var því 2-2 að loknum venjulegum leiktíma og farið beint í vítaspyrnukeppni.
Hvort lið skoraði úr sínum fyrstu tveimur spyrnum. Alexander Freyr Joensen varði hins vegar frábærlega þriðju spyrnu UMFB sem Rafn Heiðdal tók. BN náði í kjölfarið forskotinu og Ingi Steinn Freysteinsson tryggði sigurinn með að skora úr síðustu spyrnu keppninnar.
Úrslitakeppnin var BN gjöful en liðið endaði í fjórða sæti deildakeppninnar og UMFB í öðru. BN vann síðast keppnina árið 2012 og varð þar með bikarinn. Þar áður hafði liðið endað í öðru sæti fimm ár í röð.
Sveinn Hugi hjá UMFB var markahæsti maður keppninnar með 11 mörk.
